Email

පාස්කු ප‍්‍රහාරය ගැන කියන්න හිටපු ජනපතිට දුරකථනයක් තිබුණේ නැහැ - හිටපු බුද්ධි ප‍්‍රධානියෙකු පාස්කු කොමිසමේදී කියයි

පාස්කු ප‍්‍රහාරයට පෙර දින සහ ප‍්‍රහාරය එල්ල වීමට මිනිත්තු කිහිපයකට පෙර එවක ජනාධිපති මෛත‍්‍රීපාල සිරිසේන මහතාට එය දැනුම්දීමට තමන් උත්සහ කළද එය ව්‍යර්ථ වූ බව රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන පාස්කු කොමිසම හමුවේ සාක්ෂි දෙමින් ඊයේ කියා සිටියා.

ඔහු එම කොමිසම හමුවේ ඊයේ සාක්ෂි ලබාදුන්නේ 16 වන දිනටයි. ඒ වනවිට විදෙස් සංචාරයක නිරතව සිටි හිටපු ජනාධිපතිවරයා, දුරකතනයෙන් සම්බන්ධ කර ගැනීමට උත්සහ කළත්, එය ද ව්‍යර්ථ වු බවයි රාජ්‍ය බුද්ධි සේවයේ හිටපු අධ්‍යක්ෂවරයා පාස්කු කොමිසම හමුවේ සදහන් කළේ.

කොමිසම කළ ප‍්‍රශ්න කිරීම් හමුවේ හඬමින් පිළිතුරු දුන් රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන කියා සිටියේ ප‍්‍රහාරයට පෙර ජාතික ආරක්ෂක කවුන්සිලය අවසන්වරට රැුස්වූයේ පෙබරවාරි මාසයේ බවයි.

ප‍්‍රහාරයක් සිදුවන බවට පාස්කු ප‍්‍රහාරයට පෙර දින සහ ප‍්‍රහාරය එල්ල වූ දින නිලන්ත ජයවර්ධනට ලද විදෙස් තොරතුරුකරුගේ බුද්ධි තොරතුර එවක ජනාධිපතිවරයාට දැනුම් නොදුන්නේ මන්දැයි රජයේ අතිරේක සොලිසිටර් ජනරාල්වරිය මෙහිදී විමසීමක් කළා. එහිදී රාජ්‍ය බුද්ධි සේවයේ හිටපු අධ්‍යක්ෂවරයා කියා සිටියේ තමන් ජනාධිපතිවරයා සම්බන්ධ කර ගැනීමට උත්සහ කළ බවයි.

ජනාධිපති ආරක්ෂක දිසාව භාර නියෝජ්‍ය පොලිස්පති රොහාන් සිල්වා ද දුරකතනයෙන් අමතා තමන්ට ජනාධිපතිවරයා සම්බන්ධ කර ගැනීමට අවශ්‍ය බව ඔහුට ද දැනුම් දුන් බව සාක්ෂිකරු කොමිසම හමුවේ සදහන් කළා. පසුව ජනාධිපති දිසාව භාර නියෝජ්‍ය පොලිස්පතිවරයා, ජනාධිපතිවරයා විදෙස් සංචාරයකට එක්ව සිටින බව තමන්ට දැනුම් දුන් බවයි රාජ්‍ය බුද්ධි සේවයේ හිටපු අධ්‍යක්ෂවරයා කොමිසම හමුවේ සදහන් කළේ.

මෙහිදී කොමිසම රාජ්‍ය බුද්ධි සේවයේ හිටපු අධ්‍යක්ෂවරයාගෙන් විමසුවේ ජනාධිපතිවරයා විදෙස්ගත වන බව තමන් දැන සිටියේ නැද්ද යන්නයි. හිටපු ජනාධිපතිවරයා විදෙස්ගත වන තෙක් දැන නොසිටි බවත්, ගුවන් තොටුපොළ නිලධාරීන් දැනුවත් කළ පසු ඒ පිිළිබද දැනුවත් වූ බව සාක්ෂිකරු මෙහිදී සදහන් කළා.

මෙහිදී කොමිසම සාක්ෂිකරුගෙන් විමසුවේ ප‍්‍රහාරයට පෙර දින ජනාධිපති ආරක්ෂක දිසාව භාර නියෝජ්‍ය පොලිස්පතිවරයා අමතා කුමක් ප‍්‍රකාශ කළේද යන්නයි. හිටපු ජනාධිපතිවරයා සමග විදෙස් සංචාරයට එක් නොවූයේ මන්දැයි යන්න තමන් ජනාධිපති ආරක්ෂාව දිසාව භාර නියෝජ්‍ය පොලිස්පතිවරයාගෙන් විමසුවා.

ඔහු එහිදී ඊට එක් නොවූ බව පැවසු අතර හිටපු ජනාධිපතිවරයා සම්බන්ධ කර දෙන ලෙස තමන් ජනාධිපතිි ආරක්ෂක දිසාව භාර නියෝජ්‍ය පොලිස්පතිවරයාගෙන් ඉල්ලීමක් කළ බවයි සාක්ෂිකරු කොමිසමට දැනුම් දුන්නේ.

පසුව ඔහු තමන්ට පැවසුවේ පැජට් පාරේ නිල නිවසේ තිබෙන දුරකතනය හරහා ජනාධිපතිතුමාගේ පෞද්ගලික ආරක්ෂකට කතා කිරීමට හැකි බවයි. හිටපු ජනාධිපතිවරයා සතුව ජංගම දුරකතනයක් නොමැති බවද ඔහු මට දැනුම් දුන්නා යනුවෙන් සාක්ෂිකරු කොමිසම හමුවේ ප‍්‍රකාශ කළා.

පසුව කොමිසම සාක්ෂිකරුගෙන් විමසුවේ ප‍්‍රහාරය පිළිබද තොරතුරු ලබාදෙන්න හිටපු ජනාධිපති මෛත‍්‍රීපාල සිරිසේන මහතාට ඇමතුමක් ලබා ගත්තේ ද යන්නයි. එහිදී සාක්ෂිකරු සදහන් කළේ තමන් පාස්කු ප‍්‍රහාරයට පෙරදින පස්වරු 06 යි 18 ට පැජට් පාරේ පිහිටි ජනපති නිල නිවසට දුරකතනය ඇමතුමක් ගෙන ජනාධිපතිවරයා සම්බන්ධ කර දෙන ඉල්ලීමක් කළ බවයි.

පසුව එම ඇමතුට පිලිතුරු දුන් අයෙකු තමන්ට සදහන් කළේ ජනාධිපතිවරයා සම්බන්ධ කර ගැනීමට උත්සහ කරන ලෙසයි.

එහෙත් පාස්කු ප‍්‍රහාරයට පෙර දින එනම් අපේ‍්‍රල් 20 වෙනිදා තමන්ට කිසිලෙසකින් හෝ ජනාධිපතිතුමාව සම්බන්ධ කර ගැනීමට නොහැකි වූ බව සාක්ෂිකරු කොමිසම හමුවේ සදහන් කළා. අනතුරුව කොමිසම විමසුවේ ඉන් පසු යලි උත්හස නොකළේද යන්නයි. නැතැයි, යන්න සාක්ෂිකරු මෙහිදී සදහන් කළා.

මේ අතර නෙල්ලිගල ජාත්‍යන්තර බෞද්ධ මධ්‍යස්ථානයේ නිර්මාතෘ පූජ්‍ය වතුරුකුඹුරේ ධම්මරතන හිමියන් ද අද පෙරවරු 10 ට පාස්කු ප‍්‍රහාරය පිළිබඳ සොයා බැලෙන ජනාධිපති කොමිසම වෙත සාක්ෂි ලබාදීමට පැමිණියා. ඒ අනුව උන්වහන්සේ මේවනවිටත් එම කොමිසම හමුවේ සාක්ෂි ලබාදෙමින් සිටිනවා.

පාස්කු ප‍්‍රහාරය මෙහෙයවූ සහරාන් හෂීම් පිළිබඳ තොරතුරු රැසක් පිළිබඳ උන්වහන්සේ මෙහිදී අනාවරණ කිරීමට නියමිතයි. 2017 වසරේදී සහරාන් හෂීම් නෙල්ලිගල ජාත්‍යන්තර බෞද්ධ මධ්‍යස්ථානය වෙත අවස්ථා 03 කදී පැමිණි බවයි උන්වහන්සේ සඳහන් කළේ.

-නෙත් නිවුස්
gossip lanka