Email

සහරාන්ට අයත් මාතලේ ඉඩමේ ගම්මිරිස් නෙළීම නවතා ඉඩම ග‍්‍රාම නිලධාරිනිය යටතට පවරයි

පාස්කු ප‍්‍රහාරයේ ප‍්‍රධාන සැකකරු වූ මියගිය සහරාන් හෂීම්ට අයත් මාතලේ හතමුණගාල ප‍්‍රදේශයේ අක්කර 25ක ගම්මිරිස් ඉඩමේ අස්වැන්න නෙළීම තාවකාලිකව නවතා එහි ඉඩම අදාළ ග‍්‍රාමසේවා වසමේ ග‍්‍රාම නිලධාරිවරිය භාරයට පැවරූ බව මාතලේ ප‍්‍රාදේශීය ලේකම් ඒ. සී. එල්. මධුවන්ති මහත්මිය ඊයේ (10දා) පැවසුවාය.


සහරාන් හෂීම්ට අයත් මෙම ගම්මිරිස් ඉඩමේ මුරකරු ඇතුළු තවත් කණ්ඩායමක් ඉතා සූක්ෂම ලෙස පිරිස යොදවා මෙහි ගම්මිරිස් අස්වැන්න නෙළා අලෙවි කර එක්තරා කණ්ඩායමකට මුදල් ලබාදෙන බවට ප‍්‍රදේශවාසීන් විසින් නගන ලද චෝදනාව ගැන විමසීමේදී ඇය මේ බව පැවසුවාය.

ග‍්‍රාම නිලධාරිවරියට මෙම ඉඩම බලා ගැනීම සඳහා නියෝග නිකුත් කර තිබියදී තවදුරටත් සූක්ෂම ලෙස කම්කරුවන් යොදවා එහි මුරකරු සහ ප‍්‍රබල ව්‍යාපාරිකයන් කිහිපදෙනකු දේශපාලන පක්ෂයක උදව්කරුවකු එම වත්තේ ගම්මිරිස් කැඞීම තවදුරටත් සිදුකරගෙන යන බවට ප‍්‍රදේශවාසීහු චෝදනා කරති.

මේ පිළිබඳව වසම භාර ග‍්‍රාම නිලධාරිනියගෙන් අප කළ විමසීමේදී කියා සිටියේ එම වත්තේ ගම්මිරිස් අසල්වැසියන් කඩන බවට තොරතුරු ලැබීම නිසා එය නැවැත්වීමට තමන්ට උපදෙස් ලැබුණ ද ඉඩම තම භාරයට පවරා නැති බවය. එම ඉඩම ඉබ‍්‍රාහිම් නමැති අයකුගේ බවත්, එහි මුරකරු ගම්මිරිස් අස්වැන්න නෙළා අයිතිකරුවන්ට මුදල් යවන බවත් ග‍්‍රාම නිලධාරිනිය කීවාය.

සහරාන් හෂීම්ගේ දේපළ අධිකරණ නියෝග මත තහනම් කර ඇති බවද, ඉඩමේ ගම්මිරිස් අස්වැන්න දින කිහිපයක් තිස්සේ කණ්ඩායමක් නෙළමින් සිටින බව ද ප‍්‍රදේශවාසීහු කියති.

මේ පිළිබඳව මාතලේ ප‍්‍රාදේශීය ලේකම් ඒ.සී.එල්. මධුවන්ති මහත්මියගෙන් විමසීමේදී කියා සිටියේ මෙම දේපළ සහරාන් හෂීම්ට අයිති බව තහවුරු වී ඇතත්, ලිඛිතව මෙම දේපළ රාජසන්තක කළ බවට තමා වෙත දන්වා නොමැති බවය. කෙසේ වෙතත් මෙම ඉඩම පිළිබඳව ඉදිරි කටයුතු කෙසේ සිදු කරන්නේ ද යන්න නීතිපතිවරයාගෙන් විමසා ලිපි යවා තිබෙන බවත්, එතෙක් මෙම ඉඩමට කිසිම අයකුට ඇතුළු වීමට හෝ අස්වනු නෙළීමට ඉඩ නොදෙන ලෙස උපදෙස් ලබා දී ග‍්‍රාම නිලධාරිවරිය භාරයේ තබා තැබීමට උපදෙස් ලබාදී ඇති බවත් ඇය වැඩිදුරටත් කීවාය.

ප‍්‍රදේශවාසීන් කණ්ඩායමක් මෙම ඉඩමේ ගම්මිරිස් අස්වැන්න නෙළන බවට තමාටද පැමිණිලි ලැබී ඇති බවත් ඇය වැඩිදුරටත් කියා සිටියාය. මේ ඉඩමට කුණු කසළ බැහැර කිරීම සඳහා පසුගියදා මාතලේ ප‍්‍රාදේශීය සභාව මගින් යෝජනා ස්ථිර කරගෙන තිබිණි.

සීගිරිය සරත් එරමිණිගම්මන
gossip lanka