Email

කොළඹ නාගරික කොමසාරිස් ධූරයෙන් ඉවත් කිරීමට එරෙහිව විරෝධතා ව්‍යාපාරක්

කොළඹ නාගරික කොමසාරිස් ධූරයේ කටයුතු කළ වී.කේ.ඒ.අනුර මහතා එම ධූරයෙන් ඉවත් කිරීමට එරෙහිව විරෝධතා ව්‍යාපාරක් පැවැත්වීමට කොළඹ මහ නගර සභාවේ වෘත්තීය සමිති තීරණය කර තිබේ.

අද (05) පෙරවරු 9.00ට කොළඹ මහ නගර සභා පරිශ්‍රය ඉදිරිපිට දී එම විරෝධතා ව්‍යාපාරය පවත්වන බව කොළඹ මහ නගර සභා ඒකාබද්ධ
බලමුළුවේ සභාපති ඩබ්ලිව්.ඒ.කරුණාදාස මහතා සඳහන් කළේය.

මීතොටමුල්ල, කුණුකන්ද නායයෑම සම්බන්ධයෙන් විමර්ශන සිදුකළ ජනාධිපති කොමිසමේ වාර්තාව සැලකිල්ලට ගනිමින් වි.කේ.ඒ.අනුර මහතා නාගරික කොමසාරිස් ධූරයෙන් ඉවත් කිරීමට බස්නාහිර පළාත් ආණ්ඩුකාරවරයා පසුගියදා පියවර ගනු ලැබීය.

අදාළ තීරණය ඉවත් කරගන්නා ලෙස කොළඹ මහ නගර සභාවේ වෘත්තීය සමිති 12ක් ආණ්ඩුකාරවරයාගෙන් මේ වන විටත් ලිඛිත ඉල්ලීමක් සිදුකර ඇති බව කරුණාදාස මහතා සඳහන් කළේය.

මීතොටමුල්ල කසළ අංගනය වෙත කසළ බැහැර කිරීම වී.කේ.ඒ.අනුර මහතා එම ධූරයට පත්වීමට පෙර ගෙන තිබූ තීරණයක් වන අතර ඔහු කොමසාරිස් ධූරයට පත්වීමෙන් අනතුරුව එම ස්ථානය වෙත කසළ බැහැර කිරීම අවදානම් බවට අවස්ථා ගණනාවකදී බලධාරීන් වෙත පෙන්වාදුන් බව ඔහු පවසයි.

එසේ තිබියදීත් ඊට විසඳුම් ලබානොදී කුණු කන්ද නායයෑමේ සම්පූර්ණ වගකීම නාගරික කොමසාරිස්වරයා වෙත පැවරීම පිළිබඳ කොළඹ මහ නගර සභාවේ සමස්ත කාර්යය මණ්ඩලය විරෝධය පල කරන බව ඩබ්ලිව්.ඒ.කරුණාදාස මහතා වැඩිදුරටත් සඳහන් කළේය.


gossip lanka