මේ ස්ථානයට ගිය දෙමළ ජාතික සන්ධානයේ සහ තවත් දෙමළ පක්ෂ කීපයක මන්ත්‍රීවරු පවසා ඇත්තේ එම ස්ථානයේ තබන්නට යන ප්‍රතිමා සිංහල බෞද්ධඉතිහාස කතා දැක්වෙන ප්‍රතිමා නිසා වහාම මේ ප්‍රතිමා නිරාවරණය කිරීමෙන් වළකින ලෙසයි.
මේ ස්ථානයට ගිය දේශපාලනඥයින් හා චිත්‍ර ඇදීමේ නිරත පිරිස අතර දැඩි වචන හුවමාරුවක් සිදු වී ඇති අතර යාපනය බන්ධනාගාර නිලධාරීන්ට දේශපාලනඥයින් පවසා ඇත්තේ මේ ක්‍රියාවට ඉඩ ලබා දිය නොහැකි බවයි.
උතුරු පළාත් සභාවේ හිටපු මන්ත්‍රී එම්.කේ.ශිවාජිලිංගම් මහතා මේ ක්‍රියාවට දැඩි සේ විරෝධය පලකරමින් කෑ කෝ ගසා එම ස්ථානයේම යාපනයේ මාධ්‍යවේදීන් සදහා මාධ්‍ය සාකච්ඡාවක්ද පවත්වනු ලැබුවා.
යාපනයේ තරුණ තරුණියන් බොහෝ ස්ථාන වල අලංකාර චිත්‍ර අදිමින් නගරය ලස්සන කළ අවස්ථාවේදී ඒ පිළිබදව දැඩි සතුටට පත් වූවත් මේ සිංහල බෞද්ධ ඉතිහාස කතා යාපනය නගරයේ නිරූපණය කිරීම පිළිබදව සතුටට පත්වීම හෝ ඊට ඉඩදීම කළ නොහැකි ක්‍රියාවක් ලෙස යාපනයේ දේශපාලනඥයින් පිරිස ප්‍රකාශ කළා.
මේ සිද්ධිය දුර දිග යාමත් සමගම දෙමළ ජාතික සන්ධානයේ යාපනයේ සිටින දේශපාලනඥයින් මේ සම්බන්ධයෙන් විශේෂ සාකච්ඡාවක් පවත්වා මේ පිළිබදව විරෝධය පලකරමින් ජනාධිපතිවරයාටත් රජයේ වගකිවයුතු ප්‍රභුන්ටත් ලිපියක් යැවීමටද තීරණය කොට එහි වගකීම දෙමළ ජාතිකසන්ධානයේ යාපනය දිස්ත්‍රික් පාර්ලිමේන්තු මන්ත්‍රී මාවෙයි සේනාධිරාජා වෙත බාර දෙනු ලැබුවා.
ඒ අනුව සිංහල බෞද්ධ ඉතිහාසය පිළිඹිබු වන අන්දමේ චිත්‍ර හා මූර්ති නිර්මාණය කොට උතුරේ ජාතිවාදය යළි ඇවිස්සීමට කටයුතු නොකරණ ලෙස දෙමළ ජාතික සන්ධානයේ යාපනය දිස්ත්‍රික් පාර්ලිමේන්තු මන්ත්‍රී මාවෙයි සේනාධිරාජා මහතා ජනාධිපතිවරයාට හා රජයට ලිපියක් යවමින්ඉල්ලීමක් කර තිබෙනවා.
යාපනයේ බන්ධනාගාරය ඉදිරිපිට චිත්‍ර ඇද ඒ අසල ප්‍රතිමා තුනක් ස්ථාපිත කිරීමට බන්ධනාගාර නිලධාරීන් ඇතුළු පිරිසක් උත්සහ කිරීම නිසා යාපනයේ ඇති නොවිය යුතු ප්‍රශ්නයක් අළුතින් හටගෙන ඇති බව මාවෙයි සේනාධිරාජා මහතාසදහන් කරනවා.
මේ චිත්‍ර හා ප්‍රතිමා මගින් සිංහල බෞද්ධ ඉතිහාසයක් යළි අනුස්මරණය කිරීමට උත්සහ කොට ඇති නිසා යාපනයේ තරුණ කොටස් ඊට විරෝධය පලකොට ඇති බැවින් ඒ චිත්‍ර හා ප්‍රතිමා ඉවත් කිරීමට පියවර ගන්නා මෙන් මාවෙයි සේනාධිරාජා මහතා ජනාධිපතිවරයාගෙන් ඉල්ලා තිබෙනවා.
යාපනයේ තරුණ තරුණියන් විශාල පිරිසක් නගරය පුරාම චිත්‍ර අදින ලද නමුත් ඒ චිත්‍ර හරහා සෞන්දර්ය අදහස් පිළිබිඹු කිරීමට උත්සහ කළා මිස ඒ ඒ ජාතීන්ට ආගම් වලට අයත් ඉතිහාස කතා නිරූපණය කිරීමක් හෝ යුද සමයේ වූ සිද්ධීන් යළි ඉස්මතුකිරීමක් සිදු නොකළ බවද මාවෙයි සේනාධිරාජා මහතා සිය ලිපියේ සදහන් කොට ඇත.
මේ නිසා මේ කාලවකවානුවේදී චිත්‍ර ඇදීමේ කටයුතු වල නිරත පිරිසට යළි ජාතිවාදයක් ඉස්මතු නොවන අන්දමේ නිර්මාණ කිරීමට කීස්යම් ක්‍රමවේදයකට අනුව උපදෙස් ලැබිය යුතු බවත් අදාල චිත්‍ර ඇදීමට පෙර එම චිත්‍ර වල පෙර සැලැස්මක් කුමන හෝ ආයතනයකට ඉදිරිපත් කොට ලබා ගන්නා අවසරයක් මත චිත්‍ර ඇදීමේ ක්‍රමයක් සකස් වන්නේ නම් මෙවැනි අර්බූද නිර්මාණය නොවන බවද මාවෙයි සේනාධිරාජා පෙන්වා දෙනවා.
කෙසේ වෙතත් යාපනයේ දෙමළ දේශපාලනඥයින්ගේ දැඩි විරෝධය නිසා බන්ධනාගාරය ඉදිරිපිට නිරාවරණය කිරීමට සූදානම් කොට තිබූ ප්‍රතිමා තුනම බන්ධනාගාර නිලධාරීන් විසින් ඉවත් කොට තිබේ.