Email

කැබිනට් මණ්ඩලය නීති විරෝධීයි - හිටපු අගවිනිසුරු ශ්‍රේෂ්ඨාධිකරණයට

පසුගිය වසරේ දෙසැම්බර් 31න් ජාතික ආණ්ඩු ගිවිසුම අහෝසි වී ඇති බවත් මේ දක්වා ගිවිසුම දීර්ඝ නොකර ඇති බවත් මේ දක්වා ජාතික ආණ්ඩුව දීර්ඝ කිරීමේ යෝජනාව පාර්ලිමේන්තුවේ සම්මත නොවී ඇති බවත් පෙන්වා දෙන හිටපු අගවිනිසුරුවරයා සරත් එන් සිල්වා මහතා ප්‍රකාශ කරන්නේ දෙසැම්බර් 31න් පසුව ආණ්ඩුව ගනු ලබන ඕනෑම
තීරණයක් අනාගතයේදී වුවද නීතිය ඉදිරියේදී අභියෝගයට ලක් කළ හැකි බවයි.

19 වැනි ආණ්ඩුක්‍රම ව්‍යවස්ථා සංශෝධනයේ 46(1) අ වගන්තිය අනුව අමාත්‍ය මණ්ඩලය 30කට සීමා විය යුතු බවත් 46(1) ආ වගන්තිය අනුව රාජ්‍ය හා නියෝජ්‍ය අමාත්‍ය ධුරවල එකතුව 40කට සීමා විය යුතු බවත් හිටපු අගවිනිසුරුවරයා පෙන්වා දෙයි.

එහෙත් මේ වන විට ජනාධිපති, අගමැති ඇතුළු අමාත්‍ය මණ්ඩලය නියෝජනය කරනු ලබන මුළු සංඛ්‍යාව 45කි. රාජ්‍ය අමාත්‍යවරුන් සංඛ්‍යාව 23ක් වන අතර නියෝජ්‍ය අමාත්‍යවරුන් සංඛ්‍යාව 22කි.

එහි එකතුව 45ක් බව පෙන්වා දෙන සරත් එන්. සිල්වා මහතා ප්‍රකාශ කරන්නේ අමාත්‍ය මණ්ඩලයේ එකතුවත් රාජ්‍ය අමාත්‍යවරුන් හා නියෝජ්‍ය අමාත්‍යවරුන්ගේ එකතුවත් සීමාව ඉක්මවා ගොස් තිබෙන බවයි.

වංචනික වගන්තියක්:

මීට අමතරව 19 වැනි ආණ්ඩුක්‍රම ව්‍යවස්ථා සංශෝධනයට යහපාලකයන් විසින් වංචනික වගන්තියක් හඳුන්වා දී තිබෙන බවත් මෙයද අධිකරණයේදී අභියෝගයට ලක් කළ හැකි බවත් සරත් එන්. සිල්වා මහතා පෙන්වා දෙයි.

19 වැනි ආණ්ඩුක්‍රම ව්‍යවස්ථාවේ 46(4) වගන්තියෙන් 46(1) අ, ආ යන වගන්තිවල කුමක් සඳහන් වුවද ජාතික ආණ්ඩුවක් පිහිටුවනවා නම් එය පාර්ලිමේන්තුවේ සරල බහුතරයකින් අනුමත විය යුතු බව පෙන්වා දී තිබෙන බව පවසන සරත් එන්. සිල්වා මහතා, මෙය වංචනික වගන්තියක් බව සඳහන් කරයි.

46(5) වගන්තියෙන් ජාතික ආණ්ඩුව වශයෙන් අර්ථ දක්වා තිබෙන්නේ පාර්ලිමේන්තුවේ වැඩිම ආසන ලබාගත් දේශපාලන පක්ෂය සමඟ අනෙකුත් සියලුම දේශපාලන පක්ෂ හා කණ්ඩායම්වල 'එකතුව' යනුවෙන් සඳහන් වී තිබෙන බව සඳහන් කරන හිටපු අගවිනිසුරුවරයා, පෙන්වා දෙන්නේ වර්තමාන ආණ්ඩුව ඒ ආකාරයෙන් නිර්මාණය වී නොමැති බවයි.

එම නිසා මෙහි 'එකතුව' යන වචනය ශ්‍රේෂ්ඨාධිකරණයෙන් අර්ථ නිරූපණය කළ යුතු බවත් එය පාර්ලිමේන්තුවට පැවැරීම යුක්ති සහගත නොවන බවත් ජාතික ආණ්ඩුව සඳහා සරල බහුතරයක අනුමැතියක් නොව පාර්ලිමේන්තුවේ 2/3ක බහුතරයේ අනුමැතියක් ලැබිය යුතු ලෙස වඩා ප්‍රජාතන්ත්‍රවාදී ආකාරයෙන් මේ වගන්ති සකස් විය යුතු බවත් හිටපු අගවිනිසුරු සරත් එන්. සිල්වා මහතා වැඩිදුරටත් සඳහන් කෙළේය.

(මව්බිම)



gossip lanka