හිරු සහ සිරසත් උසාවි කැඳවයි – රන්ජන්ගේ නඩුව ගැන අද දුන් නියෝගය මෙන්න - HOT NEWS | HotNews.lk | Gossip Lanka | හොට් නිව්ස්

HOT NEWS | HotNews.lk | Gossip Lanka | හොට් නිව්ස්

HotNews.lk Latest News and Gossip Updates from Sri Lanka.

gossip lanka

Wednesday, September 5, 2018

හිරු සහ සිරසත් උසාවි කැඳවයි – රන්ජන්ගේ නඩුව ගැන අද දුන් නියෝගය මෙන්න

අධිකරණයට අපහාස කළේ යැයි චෝදනා එල්ල වී සිටින නියෝජ්‍ය අමාත්‍ය රංජන් රාමනායකට එරෙහිව ගොනු කර තිබෙන පැමිණිල්ල දෙසැම්බර් මස 10 වන දා සිට විභාගයට ගැනීමට ශ්‍රේෂ්ඨාධිකරණය නියම කළා.

අදාළ පැමිණිල්ල අද (05) අග විනිසුරු ප්‍රියසාත් ඩෙප්, විජිත් මළල්ගොඩ
සහ එල් .ටී. බී. දෙහිදෙණිය යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේ කැඳවනු ලැබුවා.

එම අවස්ථාවේ වගඋත්තරකාර නියෝජ්‍ය අමාත්‍ය රංජන් රාමනායක ද අධිකරණය හමුවේ පෙනී සිටියා.

මෙහිදී නීතිපතිවරයා විසින් පුද්ගලයින් 14 දෙනෙකුගෙන් සමන්විත සාක්ෂි ලැයිස්තුවක් සහ නඩුභාණ්ඩ අටක් අධිකරණය වෙත ඉදිරිපත් ක‍ළ අතර එම නඩු භාණ්ඩ අතර නියෝජ්‍ය අමාත්‍යවරයාගේ ප්‍රකාශය අඩංගු බව කියන සංයුක්ත තැටි හතරක් සහ එම ප්‍රකාශය පළ කෙරුණු ප්‍රවෘත්ති වාර්තා හතරක් ද ඇතුළත් වූවා.

එම කරුණු සලකා බැලූ ශ්‍රේෂ්ඨාධිකරණය පැමිණිල්ල දෙසැම්බර් මස 10 , 11 සහ 12 වනදා යන දිනවල විභාගයට ගැනීමට නියම කළ අතර එදින සාක්ෂිකරුවන් ලෙස නම් කර තිබූ සිරස සහ හිරු රූපවාහිනී ආයතනවල නියෝජිතයින් හය දෙනෙකුට ද එදින අධිකරණය හමුවේ පෙනී සිටින්නැයි දන්වා සිතාසි ද නිකුත් කළා.

වගඋත්තරකාර නියෝජ්‍ය අමාත්‍ය රංජන් රාමනායක වෙනුවෙන් පෙනී සිටි ජනාධිපති නීතිඥ එම්. ඒ. සුමන්දිරන් අධිකරණය හමුවේ කරුණු දක්වමින් වගඋත්තරකරුගේ අපහාසාත්මක බව කියන ප්‍රකාශය මාධ්‍ය ආයතන ගණනාවක්ම නැවත නැවත වරින්වර ප්‍රචාරය කර ඇති බවත් එම ආයතන සම්බන්ධයෙන් ද අධිකරණයට අපහාස කිරීම යටතේ කටයුතු කළ යුතු බව දන්වා සිටියා.

එවිට ශ්‍රේෂ්ඨාධිකරණ විනිසුරුවරු සඳහන් කර සිටියේ ඒ පිළිබඳව පසුව සලකා බැලිය හැකි බවයි.

පූජ්‍ය මාගල්කන්දේ සුදන්ත හිමියන් සහ විශ්‍රාමික ගුවන් හමුදා නිලධාරියෙකු වන සුනිල් පෙරේරා විසින් ඉදිරිපත් කළ පැමිණිලිවලට අනුව නීතිපතිවරයා විසින් රන්ජන් රාමනායක මහතාට එරෙහිව චෝදනා පත්‍රය ඉදිරිපත් කර තිබෙනවා.

පෙත්සම්කරුවන් කියා සිටින්නේ ඉකුත් අගෝස්තු මස 21වන දා අරලියගහ මන්දිරයේ රනිල් වික්‍රමසිංහ අග්‍රාමාත්‍යවරයා සමඟ පැවැත්වූ සාකච්ඡාවකින් අනතුරුව මාධ්‍යවලට ප්‍රකාශයක් කළ රන්ජන් රාමනායක නියෝජ්‍ය අමාත්‍යවරයා මෙරට විනිසුරුවරුන්ගෙන් සහ නීතිඥවරුන්ගෙන් අති බහුතරය දූෂිත පුද්ගලයන් වශයෙන් හඳුන්වා දී ඇති බවයි.

මෙම ප්‍රකාශය හරහා මහජනතාවට මෙරට අධිකරණ පද්ධතිය පිළිබඳ පවතින විශ්වාසය බිඳ වැටෙන බව පවසන පැමිණිලිකරුවන් මේ තුළින් නියෝජ්‍ය අමාත්‍ය රන්ජන් රාමනායක අධිකරණයට අපහාසයක් සිදු කර ඇති බවට තීන්දු කොට ඔහුට දඬුවම් පමුණුවන මෙන් ඉල්ලා සිටිනවා.